Walt Disney компани АНУ-д стриминг үйлчилгээнийхээ захиалгын үнийг 25 хүртэл хувиар өсгөхөөр болжээ. Тус компанийн өрсөлдөгч Netflix зэрэг стриминг үйлчилгээ үзүүлэгч компаниуд саяхан үнээ өсгөсөн билээ. Тэгвэл Disney ч стриминг салбарынхаа ашиг орлогыг нэмэгдүүлэхээр шийдсэн бололтой.

Walt Disney компанийн зүгээс орон нутгийн цагаар 6-ны өдөр зарласан шинэ төлөвлөгөөний дагуу зар сурталчилгаатай болон зар сурталчилгаагүй Disney+ багцын үнэ 7.99, 13.99 ам.доллар байсан бол тус бүр 2 ам.доллароор нэмэгдэж 9.99, 15.99 ам.доллар болж буйг онцлов. Түүнчлэн тус компанийн өөр нэг стриминг платформ болох Hulu-ийн зар сурталчилгаа бүхий багц мөн л 7.99 ам.доллараас 9.99 ам.доллар болжээ.

Эдийн засгийн мэдээллээр төрөлжсөн АНУ-ын CNBC агентлаг Disney стриминг үйлчилгээнийхээ үнийг ийнхүү өсгөж буй явдал нь саяхан худалдаанд гарсан багцынхаа захиалагчын тоог өсгөх зорилготой хэмээн дүгнэсэн байна. Тодруулбал тус компани нь зөвхөн өөрийн Disney+, Hulu, ESPN+ платформууддаа зориулж багц гаргадаг байсан ч өнгөрсөн сард Warner Bros. Discovery-тэй хамтран HBO Max-ыг нэмсэн шинэ багцыг хэрэглэгчдэд санал болгосон юм. Уг багцын зар сурталчилгаа бүхий хувилбар 16.99 ам.доллар бол зар сурталчилгаагүй хувилбар нь 29.99 ам.доллар аж.

Мэдээлэл технологийн мэдээ мэдээллээр төрөлжсөн The Verge сайт үүнтэй холбоотойгоор "Стриминг үйлчилгээнийхээ ашиг орлогыг нэмэгдүүлэх стратеги гэдэг нь тодорхой ч энэ шийдвэр захиалагчдад таалагдахгүй нь лавтай” хэмээн шүүмжилжээ. Мөн өдөр Нью-Йоркийн хөрөнгийн бирж дээр Walt Disney компанийн хувьцааны ханш өмнөх өдрөөс 2,49 хувиар өсөж, 89.97 ам.долларт хүрсэн байна.

Эх сурвалж: Hankyung