ОХУ-ын шатарчин Амина Абакарова тэмцээний үеэр өрсөлдөгчөө мөнгөн усаар хордуулж хорих ял сонсжээ.

Тухайлбал, ОХУ-ын Бүгд Найрамдах Дагестан Улсын шатрын дасгалжуулагч өдгөө 40 настай Амина Абакарова наймдугаар сарын 2-нд болсон Дагестаны шатрын аварга шалгаруулах тэмцээний үеэр өрсөлдөгч 30 настай Умайганат Османоваг мөнгөн усаар хордуулаад баригджээ.

Эх сурвалжийн мэдүүлснээр Абакарова тэмцээн болох танхимын хяналтын камерыг хүмүүсээс асууж сураглаж яваад ажилладаггүй гэж дуулжээ. Тэгээд Османоваг ирэхээс 20 минутын өмнө танхимд ирж, халууны шил хагалан мөнгөн усыг нь түүний суудал, ширээн дээгүүр цацсан байна.

Тэмцээн эхэлснээс 30 минутын дараа Османовагийн бие муудаж эхэлсэнд эмч нар түүнийг үзээд хордсон хэмээн оношилсон аж. Иймд хяналтын камер шүүж үзсэний үндсэн дээр цагдаа нар Абакароваг баривчилжээ.

Абакарова цагдаад мэдүүлэхдээ “Өрсөлдөгчөө тэмцээнээс гаргахыг хүссэн, хувийн шалтгаанаар түүнд дургүй. Гэмтээж хохироохыг хүсээгүй, айлгах зорилготой энэ хэргийг үйлдсэн” гэжээ.

Цагдаа нарын мэдээлснээр Абакарова гурван жил хоригдох юм байна. Мөн ОХУ-ын шатрын холбооны мэдээлсэнчлэн түүний шатрын тэмцээн уралдаанд оролцох эрхийг бүх насаар нь хориглож магадгүй гэнэ.

Эх сурвалж: CHESS