ОХУ-ын бүгд найрамдах Чечен улсын удирдагч Рамзан Кадыров Тесла үйлдвэрийн Кибертрак автомашиныг унаж үзмэгцээ фронтод илгээх санал дэвшүүлжээ. Тэгэхдээ тэрээр автомат буу суурилуулсан цахилгаан пикап машинууд галын шугамд маш том дэмжлэг болж чадна хэмээн үзсэн байна.
Телеграм сулжээнд өнгөрсөн амралтын өдрүүдээр байршуулсан дүрс бичлэгүүдээс үзвэл, Кадыров үнэхээр Кибертрак машины олноос хүртсэн Кибер мангас гэдэг хоч нь үнэн эсэхийг өөрийн биеэр шалгахын тулд Илон Маскаас тус машиныг захиалан авч унаж үзсэн гэнэ.
Тийнхүү тэрээр шинэхэн Кибертракаа унан хотын төвөөр явж үзсэнийхээ дараа “Энэ машинд үнэхээр дурлалаа. Гарцаа байхгүй хорвоогийн хамгийн сайхан хүлгүүдийн нэг мөн байна. Тухтай, хурдтай, хүчтэй, жолоодоход хялбар, үзүүлэлт сайн. Үнэхээр хосгүй хурдан амьтан юм. Ийм сайн машиныг Украины фронтод илгээх хэрэгтэй, тэнд л тохирно. Дайчдад маань мөн ч их хэрэг болно доо. Энэ цагийн суутан Илон Маскад талархъя. Грознид хүрэлцэн ирэхийг урья, хамгийн хүндтэй зочин минь болоорой. Спасибо, Илон Маск!” хэмээн хэлжээ.
Харин үүнд Илон Маск одоогийн байдлаар албан ёсны хариу өгөөгүй байгаа юм.
Эх сурвалж: RT