![](c/2408/W9-4M5G878-1T111O5-GP4TNOV-VS.jpg)
Автомашин үйлдвэрлэгч Америкийн General Motors (GM) компани программ хангамжийн салбарын мэргэжилтнүүд зэрэг 1000 гаруй ажилтнаа цомхотгожээ. Түүнчлэн гүйцэтгэл удаашралтай байгаатай холбоотойгоор Хятад улсад нэмэлт цомхотгол хийх болов уу гэж мэргэжилтнүүд таамаглав.
CNBC сувгийн орон нутгийн цагаар 19-ний өдөр мэдээлснээр, General Motors компани мөн өдрийн өглөө 1000 гаруй ажилтнууддаа цомхотголд өртсөн тухай мэдэгдсэний дотор Детройт хотын ойролцоох төв байрны технологийн кампус дээр ажиллаж байсан 600 орчим ажилчид багтжээ. Энэ удаагийн цомхотгол тус компанийн дэлхийн хэмжээнд ажиллаж байгаа 76.000 ажилтны ойролцоогоор 1.3 хувийг хамрах төлөвтэй байгаа юм.
Тус компанийн программ хангамж, үйлчилгээний хэлтсийг удирдаж байсан Apple-ын гүйцэтгэх захирал асан Дэд ерөнхийлөгч Майк Эбботт эрүүл мэндийн шалтгаанаар өнгөрсөн гуравдугаар сард компаниа орхисон билээ.
"Бид компанийхаа ирээдүйг тодорхойлох ажлынхаа хүрээнд бизнесээ хурдасгаж, амжилт гаргах, зоригтой сонголт хийх, хөрөнгө оруулалтаа хамгийн өгөөжтэйгөөр эрэмбэлэхийн тулд “ачаагаа” хөнгөлөх ёстой" гэж компанийн зүгээс уг шийдвэртэй холбогдуулан тайлбар хийв. Үргэлжлүүлэн “Тиймээс ч бид программ хангамж болон үйлчилгээний салбарынхаа зарим багийг цомхотгохоос аргагүйд хүрлээ" хэмээн цохон тэмдэглэв.
Үүний зэрэгцээ Bloomberg агентлагийн мэдээлснээр, General Motors гүйцэтгэлийн хувьд хангалтгүй байгаа Хятад дахь бизнесийнхээ бүтцийг өөрчлөх талаар мөн төлөвлөж байгааг онцолжээ. Тус компани нь Хятад дахь түнш болох Шанхайн Автомашины Корпорацитай хамтран судалгаа, хөгжүүлэлтийн хэлтэсийн мэргэжилтнүүдийг цомхотгох, орон нутгийн үйлдвэрлэлийг бууруулах магадлалтай хэмээн тус мэдээнд дурдсан байна.
Эх сурвалж: Maeil