мРНХ технологийг ашиглан гарган авсан, уушгины хорт хавдрын анхны вакцины олон улсын эмнэл зүйн туршилт долоон улсад эхэлсэн тухай “Guardian” сонин мэдээлжээ.

Тодруулбал, “BNT116” хэмээн нэрлэсэн вакцины эмнэл зүйн туршилтын эхний үе шат Их Британи, АНУ, Герман, Унгар, Польш, Испани, Турк гэсэн долоон улсад байрлах 34 судалгааны төвд эхэлсэн байна.

Эл вакцин нь уушгины хорт хавдрын вакцины төрөлдөө анхных нь бөгөөд Германы “BioNTech” компанид “COVID-19”-ийн вакцины үндэс суурийг тавьсан мРНХ технологийг ашиглан гарган авчээ. “BNT116” нь хорт хавдрын эсүүдийг илрүүлэх, хүний дархлааны системийг тэдгээртэй тэмцэхэд чиглүүлдэг байна.

Эмнэлзүйн туршилтад жижиг эсийн бус уушгины хорт хавдартай 130 орчим өвчтөн оролцох ба тэдэнд нэг жилийн хугацаанд олон арван тун вакцин хийх аж.

Энэхүү шинэ вакцин нь дэлхий даяар уушгины хорт хавдрыг эмчлэх стандарт болно гэж эмч нар найдаж байна.

Эх сурвалж: МОНЦАМЭ