“Телеграм” нийгмийн сүлжээний компанийг үүсгэн байгуулагч, гүйцэтгэх захирал Павел Дуровыг баривчлах ажиллагаанд Францын Засгийн газар оролцоогүй гэж тус улсын Ерөнхийлөгч Эммануэл Макрон даваа гарагт мэдэгджээ.
“Телеграмын захирлыг Францын нутаг дэвсгэрт баривчилсан нь шүүхээс явуулж буй мөрдөн байцаалтын хүрээнд явагдсан ажиллагаа. Энэ бол улс төрийн шийдвэр биш. Үүнийг шүүгчид шийднэ” гэж Э.Макрон хэлсэн байна.
Хувийн онгоцоороо Парист ирснийх нь дараа П.Дуровыг өнгөрсөн бямба гаргийн шөнө баривчилжээ. Баривчлах ажиллагаа нь хүүхдийн порнограф, мансууруулах бодисын наймаа, зохион байгуулалттай мөнгө угаах гэмт хэрэг зэрэг хэд хэдэн хэргийг мөрдөн шалгах ажиллагааны хүрээнд явагдсан гэж Парисын прокурорын газар мэдэгдсэн байна.
Прокурорын мэдээлснээр, мөрдөн байцаалтыг “үл мэдэгдэх хүний эсрэг” явуулсан бөгөөд П.Дуровтай холбоогүй ажээ. “Телеграм”-ын захирал одоогоор түр саатуулагдсан хэвээр байгаа юм. “Телеграм”-ын зүгээс мэдэгдэхдээ, гүйцэтгэх захирал болох орос гаралтай Франц-Эмиратын иргэнд “нуух зүйл байхгүй” бөгөөд компани ЕХ-ны хуулийг дагаж мөрддөг гэжээ.
П.Дуровыг баривчилсан явдлыг технологийн салбарынхан болон Оросын албаныхан шүүмжилсэн байна. Оросын сенатч Алексей Пушков хэлэхдээ, Франц бол “эрх чөлөөг тунхагладаг хүмүүсийг тэвчдэггүй либерал дарангуйлал” гэж тодорхойлжээ. Мөн X нийгмийн сүлжээний эзэн Илон Маск өөрийн платформ дээрээ “#FreePavel” гэж нийтэлсэн байна. Орост амьдардаг Америкийн шүгэл үлээгч Эдвард Сноуден Э.Макроныг “хувийн харилцаа холбооны хэрэгслийг барьцаалах хэмжээнд хүртлээ шалдаа буусан” гэж буруутгажээ.
Харин Францын Ерөнхийлөгч үүнтэй санал нийлэхгүй байгаагаа илэрхийлсэн байна. Э.Макрон даваа гарагт хэлэхдээ, Франц улс үзэл бодлоо илэрхийлэх, харилцаа холбоо тогтоох эрх чөлөө, инновац, бизнес эрхлэхийг юу юунаас илүүтэй эрхэмлэдэг гэсэн байна. Түүний энэ тайлбар бол П.Дуровыг баривчилсны дараа Францын өндөр албан тушаалтны олон нийтэд хандан хийсэн анхны мэдэгдэл юм. П.Дуров 2021 онд Францын иргэн болжээ.
Эх сурвалж: МОНЦАМЭ