БНХАУ-ын цахилгаан машин үйлдвэрлэгч BYD технологийн арвин туршлагатай Уавэй брэндтэй хамтран ажиллахаар гэрээ үзэглэж, бартаат замын Фанченбао цахилгаан машиндаа тус брэндийн автомат жолоодлогын системийг ашиглахаар болжээ.
Ийнхүү дээрх гэрээний дүнд Уавэйн хиймэл оюун ухаан бүхий Чианкүн автомат жолоодлогын системийг хамгийн анх Фанченбао маркийн Бао8 машинд суулгаж, энэ оны эцсээр худалдаанд гаргах аж.
Ийн Уавэй брэндтэй хамтарч ажиллах болсон шалтгаан нь BYD үйлдвэр өөрсдийн тансаг зэрэглэлийн Дэнза, Фанченбао, Янван маркийн машинуудынхаа үнэ цэнийг өсгөх гэсэн санаа аж. Учир нь дээрх гурван маркийн машин тухайн үйлдвэрийн борлуулалтын ердөө таван хувийг эзэлж байгаа юм.
Мөн энэ шийдвэрийг салбарын мэргэжилтнүүд Хятадын цахилгаан автомашин үйлдвэрлэгчид гадаадын өрсөлдөгч компаниудынхаа автомат жолоодлогын системийг гүйцэж, илүү гарах гэсэн зүтгэл хэмээн харж байна.
Эх сурвалж: Reuters