Бүгд найрамдах Чех улсын Ерөнхийлөгч 62 настай Петр Павел мотоциклтойгоо осолдсоноос болж эмнэлэгт хүргэгджээ.
Албаныхны мэдээлж байгаагаар “Ерөнхийлөгч мотоциклтойгоо осолдож, яаралтай Прагийн цэргийн их сургуулийн эмнэлэгт хүргэгдсэн. Ноцтой шархдаагүй ч эмч нарын хяналтад байх шаардлагатай байна” гэнэ.
Одоохондоо ослын тухай нарийн мэдээлэл ил болоогүй байна. Чехийн цагдаа нарын мэдээлснээр осол авто зам дээр биш, хувийн уралдааны зам дээр болсон бөгөөд зам тээврийн осол гэж үзэхгүй байгаа аж.
Тэтгэвэртээ гарсан генерал тэрээр мотоцикл унах тун хорхойтой хүн. Ерөнхийлөгч болсон ч хоббигоо орхиогүй юм санж. Тэр байтугай өнгөрсөн оны дөрөвдүгээр сард дуулгагүй мотоцикл унаж яваа бичлэг нь цахим орчинд тарснаас болж олны өмнө уучлал гуйн сайн дураар хамгийн өндөр торгууль төлсөн удаатай.
Эх сурвалж: RT