Израилын тал Бейрутын хаяа хотод цохилт өгсөн явдалд НҮБ маш ихээр түгшиж байгаагийн зэрэгцээ дээд зэргээр хүлээц тэвчээртэй байхыг талуудад уриалж байна. Энэ тухай НҮБ-ын Ерөнхий нарийн бичгийн даргын ажлын албанаас гаргасан мэдэгдэлд дурджээ.

“7 дугаар сарын 30-ны өдөр Израилын арми хүн ам шигүү суурьшсан Бейрут хотын өмнөд дүүрэгт цохилт өгсний улмаас энгийн иргэд амиа алдсантай холбогдуулан маш түгшиж байгаагаа бид илэрхийлэхийн сацуу дээд зэргээр хүлээц тэвчээртэй байж, мөргөлдөөнийг цаашид даамжруулахгүй байхыг холбогдох талуудад уриалж байна” гэж мэдэгдэлд онцлон тэмдэглэсэн байна.

Өчигдөр буюу мягмар гарагт Израилын сөнөөгч онгоцуудаас Бейрутын өмнөд хэсгийн хаяа хот болох Дахия руу харвасан дөрвөн пуужинд дөрвөн давхар байшин болон түүний зэргэлдээх барилгууд, зогсоолд байсан автомашинууд өртжээ. 3 хүн амиа алдсаны дотор 4-6 насны хоёр хүүхэд байгаа бөгөөд нийтдээ 74 хүн гэмтэж шархадсан байна.

Энэхүү пуужингийн цохилт өгсөн зорилго нь “Хезболлах” бүлэглэлийн цэргийн штабын удирдагч Фуад Шокр-ыг устгах явдал байжээ. Телевизийн Al Hadath сувгийн мэдээлснээр, шархадсан Ф.Шокр эмнэлэгт хүргэгдсэнийхээ дараа нас барсан байна.

Эх сурвалж: МОНЦАМЭ