Олон улсын кредит үнэлгээний Фитч Рейтингээс мягмар гарагт Украины наймдугаар сарын 1-нд төлөх ёстой байсан 750 сая ам.долларын 2026 евробондын купон төлөх арван өдөр харж үзэх хугацаа дууссан хэмээн зээлжих зэрэглэлийг “Хязгаарлагдмал дампуурсан” болгон бууруулжээ.
Фитч агентлагийн мэдээлж байгаагаар, IDR(Үнэт цаас гаргагчийн дампуурлын үнэлгээ) болон бусад үнэлгээний дагуу Украин дампуурсан нь тодорхой байгаа гэнэ.
Түүнээс гадна мөн АНУ-ын үнэлгээний S&P Global агентлаг ч гэсэн Украины зээлжих зэрэглэлийг наймдугаар сарын нэгэнд “дампуурсан” болгож бууруулсан юм.
Орос, Украины зөрчил мөргөлдөөн эхэлснээс хойш 2022 онд зээлдүүлэгчид Украины өрийн төлбөрийг хоёр жилийн хугацаатай царцаах шийдвэр гаргасан нь энэ оны наймдугаар сард дууссан билээ.
Иймд Киевийн удирдлагууд хугацаа дуусахаас хоёр долоо хоногийн өмнөөс буюу долоодугаар сарын 22-ноос эхлэн зээлдүүлэгч нартай 20 тэрбум ам.долларын өрийн бүтцийг өөрчлөх тухай урьдчилан хэлэлцэх гэх мэт аргаар бонд эзэмшигч нартай тохиролцохоор хичээж байгаа юм.
Эх сурвалж: RT