Афганистаны талиб удирдагч нар исламын дэглэмийн дагуу тун хатуу шинэ хууль батлан олон нийтийн газарт эмэгтэйчүүдийн дууг хорилоо.

Нийтийн тээвэр, хөгжим, сахал үсээ хусах, баяр тэмдэглэх гэх мэт өдөр тутмын амьдралын хэв маягтай холбоотой хуулийн төслийг дээд удирдагч Хибатуллах Ахундзада зөвшөөрч, лхагва гарагт баталсан тухай засгийн газрын хэвлэлийн төлөөлөгч мэдээлжээ.

Тэгтэл шинэ хуулийн 13-р зүйлд эмэгтэйчүүдийн амьдралтай холбоотой заалт оржээ. Тус зүйлд зааснаар эмэгтэйчүүд олон нийтийн газарт бүх биеэ халхалсан хувцас өмсөхөөс гадна бусдыг уруу татаж, уриалан дуудахаас сэргийлж нүүрээ далдлан гивлүүр өмсөх ёстой, хувцасны хувьд бариу, нарийн, богино байж болохгүй гэжээ. Цаашлаад эмэгтэйчүүд Исламын шашингүй эрэгтэй, эмэгтэй ямар ч хүний өмнө нүүр, биеэ халхалснаар уруу татагдахаас сэргийлэх ёстой аж.

Мөн тус хуулиар эмэгтэй хүний дуу хоолойг дотно харилцааны хэлбэр хэмээн үзэж, тийм учир олон нийтийн газар эмэгтэй хүний дуулах, үзэл бодлоо илэрхийлэх, юм унших хоолой сонсогдохгүй байх ёстой гэж зохицуулжээ. Бас эмэгтэйчүүд өөртэйгөө цусан болон гэр бүлийн холбоогүй эрэгтэй хүн рүү харах хориотой юм.

Эх сурвалж: CNN