Цагаан хэрэм рүү мацаад өлсөж ядарсан жуулчид хоолоо агаараар хүргүүлж иддэг болжээ.

БНХАУ-ын хоол хүргэлтийн Мэйтуан компани Бээжингийн төвөөс хол, үйлчилгээ авах боломжгүй эртний байгууламж дээр хоол, унд, эм хэрэгсэл гэх мэт хөнгөн бараа хүргүүлэн авах шинэ үйлчилгээгээ өнгөрсөн долоо хоногт зарласан байна.

Энгийн хэрэглээний дрон үйлдвэрлэл, экспортоороо дэлхийд тэргүүлэгч Хятад оронд дрон хүргэлтийн үйлчилгээ эрчтэй хөгжиж, ийнхүү нийслэл Бээжинд анхны дрон хоол хүргэлтийн үйлчилгээ нээгджээ.

Дроноор бараа хүргэх хүрээ цагаан хэрмийн ойролцоох зочид буудлуудын дээврээс Бадалины өмнөд өргөтгөл хүртэл байх юм гэнэ. Дрон салхитай, бороотой цаг агаарт ажрахгүй бөгөөд нэг нислэгээр 2.3кг жинтэй бараа хүргэх чадалтай аж.

Үнийн хувьд тус компанийн бусад хүргэлттэй ижил дөрвөн юань, өдөр бүр 10-16 цагийн хооронд ажиллах юм байна. Харин 16 цагаас хойш хүргэлтийн дронууд хог зөөх ажилдаа орох гэнэ.

Хэдий хол зам туулж байгаа нь дрон боловч үүнд хүний оролцоо чухал юм. Тухайлбал, хоол захиалмагц хүргэлтийн ажилтан үйлчлүүлэгчийн захиалгыг бэлтгэж, зочид буудлын дээвэр дээр гаран дронд бэхлээд хөөргөх аж. Дроныг жолоодох шаардлагагүй, өөрсдөө автомат жолоодлогоор хэрэглэгчид очих бөгөөд хүлээн авах цэгт өөр нэг ажилтан барааг дроноос авч, захиалагчийн гарт хүлээлгэж өгөх юм байна.

Эх сурвалж: CNN