Ням гарагт БНХАУ-ын Гадаад хэргийн яамнаас АНУ-ын стратегийн төлөөлөгч нартай хийсэн уулзалтаа хураангуйлж дүгнэсэн тайланг нийтэлжээ.
БНХАУ-ын Гадаад хэргийн сайд Ван Игийн өнгөрөгч пүрэв гарагт АНУ-д газардсан бөгөөд гурван өдрийн хугацаатай тус айлчлалынхаа хүрээнд тэрээр АНУ-ыг ерөнхийлөгч Жо Байден, төрийн нарийн бичгийн дарга Энтони Блинкен, үндэсний аюулгүй байдлын зөвлөх Жейк Салливан нартай уулзсан юм. Улмаар уулзалтын төгсгөлд талууд ирэх арваннэгдүгээр сард Сан Франциско хотод болох Ази-Номхон далайн Эдийн засгийн хамтын ажиллагааны ээлжит чуулганы үеэр хоёр талт уулзалт хийхээр тохирчээ.
Тэгвэл эл тохиролцооны хүрээнд Хятадын Гадаад хэргийн сайд Ван И өөрийн сэтгэгдлийг илэрхийлсэн нь, түүний үзэж байгаагаар ирэх сард зохион байгуулагдах төрийн тэргүүн нарын уулзалт тийм ч тайван уур амьсгалтай байхгүй гэсэн юм. Хэдий тийм ч ноён Ван Игийн хэлснээр талууд тодорхой үр дүнд хүрэхийн тулд хамтран ажиллах хэрэгтэй хэмээжээ.
Харин тайланд тусгаснаар дэлхийд өдгөө шийдвэрлэх хэрэгтэй олон асуудал бий ч АНУ, БНХАУ хэлэлцээрийн ширээнд суух нь хоёр талын хувьд хоёуланд ашигтай бөгөөд зайлшгүй шаардлагатай зүйл гэсэн байна.
Эх сурвалж: Politico