Ажил дээрээ бэлгийн дарамтад өртсөн эмч бүсгүйг аврах гэж цагдаа нар эмнэлгийн гуравдугаар давхарт машинтайгаа орж ирж байгаа бичлэг цахим орчинд шуугиан тарьж байна.

Эл үйл явдал Энэтхэгийн Уттараханд мужийн Ришикеш дахь Анагаахын шинжлэх ухааны нэгдсэн хүрээлэнд болжээ. Тус бичлэгт нэг цагдаа эмнэлгийн хамгаалалтын албаныхантай хамтран эмнэлгийн түрдэг орнуудыг хоёр тийш зайчлан цагдаагийн машинд зам гаргаж байгаа нь харагдана.

Эх сурвалжийн мэдээлснээр тус хүрээлэнгийн эмч бусгүй рүү Сатиш Кумар гэгч ахлах сувилагч нь удаа дараа садар самуун агуулгатай зурвас бичиж, эцэст нь ажлын байран дээр хүчирхийлэхийг завдсан гэнэ.

Цагдаа нар тус хэргийг шуурхай таслан зогсоож, сэжигтнийг албан үүргээс нь түр түдгэлзүүлэн баривчилжээ. Эл хэргээс болж эмч нар энэ долоо хоногт яаралтай хагалгаанаас бусдаар ажил хаяж, эмнэлгийн даргын албан өрөөний үүдэнд жагсан, сэжигтнийг бүрмөсөн ажлаас нь халахыг шаардаж байгаа аж.

Эл үйл явдал зөвхөн эмнэлгийн ажилтнуудын дургүйг хүргээд зогсохгүй цахим орчинд ард иргэдийн дунд багагүй шуугиан тарьжээ. Цахим орчинд тус бичлэгийг үзсэн иргэд “Энэтхэгийн цагдаад эрс шинэчлэлт хэрэгтэй болсон бололтой”, “эмнэлгийн үүдээр орохоос нь өмнө машиныг бүхэлд нь халдваргүйжүүлсэн эсэх нь эргэлзээтэй” гэх мэтээр үзэл бодлоо илэрхийлж байна.

Эх сурвалж: RT