Өмнөд Солонгост 0-6 насны хүүхдүүдийн дунд гар, хөл, амны өвчлөл сүүлийн арван жилд байгаагүйгээр нэмэгдэж, цар тахал болон дэгдэх хэмжээнд эрсдэл үүсгэж байгаа учир эрүүл мэндийн байгууллагаас урьдчилан сэргийлэх арга хэмжээ авахыг онцгойлон анхааруулах болжээ.

Энэ төрлийн өвчлөлд урьдчилан сэргийлэх тарилга байхгүй учир эн тэргүүнд хувийн ариун цэвэр сахих нь нэн чухал гэнэ.

БНСУ-ын халдварт өвчнийг хянах, урьдчилан сэргийлэх газраас өнөөдөр/07.29/ ил болгосон түүвэр тандалтын дүнгээр энэ сарын гурав дахь долоо хоногт амбулаторийн 1000 нярай болон бага насны хүүхдэд ноогдох халдварын тоо 78.5 хувьд хүрч, 2019 оны 77.6 хувиас давсан нь сүүлийн арван жилд байгаагүй өндөр үзүүлэлт болж байна.

Цаашлаад энэ өвчний тархалт өнгөрсөн сарын сүүлээр 58.1 хувь байсантай харьцуулахад ийнхүү нэг сарын дотор 35 хувиар нэмэгдсэн нь энэ юм.

Мэргэжилтнүүдийн үзэж байгаагаар цар тахлын үед энэ өвчний эсрэг сүргийн дархлаа суларсан тул эхний ээлжинд хувийн ариун цэвэр сахих чадваргүй, дархлаа сул бага насны хүүхдүүд хамгийн их халдвар авч байгаа аж.

Уг өвчнийг үүсгэгч нь ихэнхдээ энтэровирусийн овогт багтдаг кокссакиэвирус байдаг авч зарим тохиолдолд өөр вирусээр үүсэх нь бий тул өмнө халдвар аваад эдгэж байсан, дархлаа тогтсон хүн ч өөр вирусээр энэ өвчинд өртөх эрсдэлтэй юм байна.

Шинж тэмдгийн хувьд, халдвар авсан хүний гар, хөл, амаар тууралт гарахаас гадна халуурч, хоолны дуршил арилж, хоолой өвдөж, тамирдах бөгөөд халдвар авснаас хойш хоёроос гурван өдөрт илэрч, цаашдаа тухайн хүний биеийн эсэргүүцлээс хамааран долоогоос арван хоногт нэмэгдэх, эсвэл багасдаг гэнэ.

Эх сурвалж: Yonhap