ОХУ-ын Ерөнхийлөгч Владимир Путин найрамдалт харилцаагаа улам сайжруулахаар тохиролцсон Умард Солонгост үерийн гамшгийг даван туулахад дэм болохоор хүмүүнлэгийн тусламж үзүүлэх санал тавьжээ.
Тэрээр БНАСАУ-ын удирдагч Ким Жон Унд илгээсэн зурвастаа “Тохиолдоод буй гамшгаас үүдэн сэтгэл шимширч, тус дэм болохыг хүслээ. Танай ард түмэнд хэзээд туслахад бэлэн гэдэгт итгэж, найдаарай” хэмээгээд гамшгийн хохирлыг арилгах, даван туулах үйлсэд шуурхай тусламж үзүүлэх хүсэлтэй байгаагаа илэрхийлсэн талаар Пёняны төрийн мэдээллийн агентлаг ням гарагт мэдээлжээ.
Хариуд нь Ким Жон Ун талархсанаа илэрхийлэн “Хүнд цагт нөхрийн чанар таниулан тусалж дэмжиж байгаад сэтгэл минь ихэд хөдөлж байна” хэмээгээд гамшгийг даван туулах өөрсдийн гэсэн төлөвлөгөө боловсруулан ажиллаж байгаагаа, мөн зайлшгүй шаардлага гарвал тусламжийн саналыг хүлээж авна гэдгээ илэрхийлжээ.
Үүнээс өмнө Өмнөд Солонгосын зүгээс тусламж үзүүлэх санал тавьсан ч Ким Жон Ун тус саналыг хүлээж аваагүйгээр барахгүй, үл тоосон хандлага үзүүлсэн юм.
Эх сурвалж: AP